Maino i reko ypykue
1
Ñande Ru Papa Tenonde
gueterã ombojera
pytũ ymágui
2
Yvára pypyte,
Apyka apu’a i
pytũ yma mbytére
oguerojera
3
Yvára jechaka mba’ekuaa
yvára rendupa
yvára popyte, yvyra’i
yvara popyte rakã poty,
oguerojera Ñamanduĩ
pytũ yma mbytére
4
Yvara apyre katu
jeguaka poty
ychapy recha
yvara jeguaka poty mbytérupi
guyra yma, Maino’i
oveve oikóvy
5
Ñande Ru tenondegua
Oyvára rete oguerojera i javé oikóvy,
yvytu yma Ire oiko oikóvy
oyvy ruparã i oikuaa’eỹ mboyve ojeupe
oyvarã, oyvarã
oiko ypy i va’ekue
oikuaa’eỹmboyve i ojeupe
Maino i ombojejuruei;
Ñamanduĩ yvarakaa
Mano i.
6
Ñande Ru Ñamandu tenondeguá
oyvara oguerojera’eỹ mboyve i
pytũ A’e ndoechái:
kuaray oiko’eỹramo jepe,
opy’a jechakáre A’e oiko oikóvy;
oyvárapy mba’ekuaápy
oñembokuaray i oiny.
7 Ñamandu Ru Ete tenondegua
Yvytu yma ire oiko oikovy;
opytu'ui oiny ápy
Uruke'a i omopytũ i oiny
omoñendúma pytũ rupa
8
Ñamandu Ru Ete tenondegua
oyvarã oguerojera’eỹ mboyve i;
Yvy Tenonde oguerojera’eỹ mboyve i:
yvytu yma ire A’e oiko oikóvy;
Ñande Ru oiko i ágüe yvytu yma,
ojeupity jevýma
ára yma ojeupity ñavõ
ára yma ñemokandire ojeupity ñavõ
Ára yma opa ramove
tajy potýpy,
yvytu ova ára pyaúpy
oikóma yvytu pyau, ára pyau
ára pyau ñemokandire
(Mbya Guarani Original as compiled by Leo Cadogan / English rendering available in this blog)
